ঘৰ

আহাৰ মহীয়া ৰ’দেপোৰা পথাৰখনত

দেখিছানে এমুঠি শিৰিশপতীয়া ছাঁ?

সেয়া মোৰ ঘৰ;

তাৰ ঠিকনা

গাঁও, পোস্ট অফিচ, ৰাজ্য, পিন নম্বৰ,

এক অপ্ৰয়োজনীয় সত্য |

পথক্লান্ত আবেলিৰ নিবিড় আশ্ৰয় মোৰ ঘৰ,

দেওবাৰে ৰাতিপুৱাৰ,  অকাৰণ অৱসাদ মোৰ ঘৰ;

ভালপোৱাৰ অকনমান ভাললগা  বিৰক্তি, মোৰ ঘৰ

তাৰ ঠিকনা

পথ নং,  চহৰ, জিলা , মহানগৰ,

এক অপ্ৰয়োজনীয় সত্য |

 ঘৰ,

মদালসা ৰাতিৰ মোৰ

নিষিদ্ধ অভিসাৰৰ নীৰৱ সাক্ষী,

মোৰ উন্মাদনাৰ আঁচোৰেৰে ক্ষত বিক্ষত

মোৰ ঘৰৰ দেৱাল;

মোৰ বন্ধু , মোৰ সহচৰ,

মোৰ দোষ-গূণ , মোৰ অত্যাচাৰ,

মোৰ প্ৰেম, মোৰ ঘৃণা,

মোৰ খং , মোৰ আমনিৰে,

মোক গ্ৰহন কৰি,

মোক আবৰি ৰাখে যি,

সি মোৰ ঘৰ,

মোৰ প্ৰয়োজনতহে মই ঘৰলৈ যাঁও;

নহলে,  

মোৰ ঘৰে মোলৈ বাট চাই ৰয়, অকল‍শৰে।

মোৰ স্বাৰ্থপৰতাক আশাৰ ডেউকাৰে ঢাকি,

ধুলিময় বাটতোৰ কা‍ষতে ৰৈ থাকে,

মোৰ ঘৰ।

যাৰ ঠিকনা,

লেন, বাইলেন, লেণ্ডমাৰ্ক কিম্বা জিপ ক’ড

এক অপ্ৰয়োজনীয় সত্য